Der Schießklub Blaue Bohne von 1954

Leeve Schüttensüstern un Schüttenbröder wie fiert 2014 den 150sten Geburtsdag vun Jesbörger Schüttenvereen vun 1864 e.V. dat is een bannig lange tied un mööt düchtig fiert warrn.

Nu gifft dat im süvigen Johr noch een Jubiläum.

De Scheetclub „Blaue Bohne“ vun 1954 ward 60 Johr.

Man schall dat gor nich glöben, ober disse lütte Vereen is wohrhaftig  am 13.3.1954 grünnt worrn. Dor hebbt sick domols een poor Frünn dropen un hefft meent se wüllt nu een Scheetklub op de Been stelln. Dat weern Siegfried Meyer, Adolf Lüllau, Adolf Gaede ,Hans Stolley un noch een poor Mannslüüd.

Anfungen hebbt se in´n Hotel Neddersassen bi Johanna un Günther Peters. Kloor dat se nich mit de scharpe Flinte ballern kunnen, ne door ward bit to´n hütigen Dag mit´n Luftgewehr schooten.

1958 sünd se dann in´t Kurhaus Bergeest wesselt. Siet 1963 weer dat dann dat Gasthaus Röder un höört de Familie Röder to. Siet 1975 heet dat dann Hotel Jesteburger Hof.  Twischen dör mööt se mool rut, dat Huus mutt mol op Schick bröcht warrn. Do hebbt se dann ook mol bi Kuddl Meyer schoten, sünd denn ober no den Ümbo wedder trüch.

De eerste Keunig weer 1954/1955 Hans Stolley, un bit vundoog hebbt se jedet Johr  den Keunig utschooten. In Momang is Claus Röder uns Keunig.

Keen uns nich kennt, kann jo geern mol vörbi kieken. Wi dröpt uns elkeen Freedag klock halbig Neegen in Kleckerwaldweg 1. Wi hebbt ook nix dorgegen wenn een mitmooken will, eenfach mol nofroogen.

Wi wünscht nu den Jesbörger Schüttenvereen un de „Blaue Bohne“ een godet  Jubiläumsjohr un alltied  GUT SCHUSS.

Thomas Kruse